Manatili sa píling ko, Panginoon,
Sapagkat kailangan Ka ngayon upang di makaligta.
Batid mong ang dali kong tumalikod.

Manatili sa píling ko, Panginoon,
Sapagkat ako’y marupok,
Upang hindi ako madalas napahihinuhod.

Manatili sa píling ko, Panginoon,
Sapagkat ikaw ang aking búhay,
At kung wala ka, wala akong lakas.

Manatili sa píling ko, Panginoon,
Sapagkat ikaw ang aking liwanag,
At kung wala ka, ako’y nása karimlan.

Manatili sa píling ko, Panginoon,
Upang maipamalas ang iyong niloloob.

Manatili sa píling ko, Panginoon,
Upang marinig ang Iyong tinig
At sumunod sa Iyong niloloob.

Manatili sa píling ko, Panginoon,
Sapagkat lunggating lubos Kang ibigin,
At lumaging maging Iyong katoto.

Manatili sa píling ko, Panginoon,
Kung ibig na maging matapat ako sa Iyo.

Manatili sa píling ko, Panginoon,
Sapagkat sa kabila ng kaabahan nitong kaluluwa,
Ibig kong maging pook ito ng kaginhawahaan sa Iyo,
Isang pugad ng pag-ibig.

Manatili sa píling ko, Panginoon,
Sapagkat kumakagat na ang dilim
At lumulubog na ang araw,
At lumilipas ang búhay; sumasapit ang kamatayan,
Paghuhusga, ang walang hanggan. Kailangan kong
Magbagong-lakas upang huwag mabalam sa landas,
At para rito, kailangan Kita.

Lumalalim ang gabi at lumalapít ang pagkaluoy,
Nasisindak ako sa dilim, tukso, tigang, krus, dalamhati.
Ay, talagang nangungulila ako sa Iyo, aking Hesus,
Sa gabing ito ng aming pagkakalayo!

Manatili sa píling ko sa gabing ito, Hesus,
Sa búhay na itong tigib ng panganib.
Kailangan Kita.

Hayaan mong mamukhaan Kitang tulad ng Iyong alagad
Sa paghahatian sa tinapay, upang ang Pagbabahaginan
Ay maging Liwanag na susupil sa dilim,
Ay maging sandigang magpapatatag sa akin,
Ay maging tanging ligaya ng puso.

Manatili sa píling ko, Panginoon,
Sapagkat sa oras ng aking pagpanaw,
Ibig kong manatiling kaisa mo,
Kundi man sa komunyon, sa biyaya at pag-ibig man lámang.

Manatili sa píling ko, Hesus,
Hindi ako humihiling ng banal na pag-alo,
Sapagkat di ako nararapat,
Ngunit ang biyaya ng iyong presensiya, Panginoon,
Ipagkaloob po Ninyo.

Manatili sa píling ko, Panginoon,
Sapakat Ikaw lámang ang aking hanap,
Ang iyong Pag-ibig, Pagpapala, Kalooban, Puso, Diwa,
Sapagkat mahal Kita
At wala akong ibang hangad na gantimpala
Kundi ang lalong mahalin Ka.

May rubdob na iibigan Ka,
Buong pagkatao habang nása lupa,
At patuloy Kang iibigin nang wagas sa eternidad.